Profil

Ivan Vladimir Buttiġieġ twieled fit-28 ta’ Novembru fl-1979 u għex u trabba ġewwa ż-Żejtun. Ħuwa kkwalifika fl-assikurazzjoni, u jaħdem ma kumpanija li tipprovdi servizz t’assikurazzjoni. Ivan huwa responsabbli għall-programm assikurattiv ta’ wħud mill-akbar ażjendi ġewwa Malta.

Ivan minn dejjem jinteressa ruħu fl-attivitajiet li jsiru ġewwa ż-Żejtun. Minn mindu kien żgħir, Ivan kien jieħu sehem fil-purċissjoni tal-Ġimgħa l-Kbira. Fil-fatt huwa għadu jerfa’ sal-ġurnata tal-lum. Ivan jinteressa ruhu wkoll fil-festi li jsiru fin-nofs in-nhar ta’ Malta, għaliex huma okkażjoni fejn wieħed jista’ jiċċelebra l-festa tal-belt jew raħal tiegħu flimkien mal-komunita’.

Il-politika kienet dejjem importanti għal Ivan. Fil-fatt huwa jqisha bħala parti minnu, u minn ċkunitu dejjem ried li jkun attiv fil-ħajja politika. Ivan beda l-karriera politika tiegħu fl-1995 u għal numru ta’ snin okkupa l-kariga ta’ President tal-forum zgħazagh Laburisti fil-fergħa taż-Żejtun. Fl-1997 Ivan kien wiehed mill-membri fondaturi ta’ l-għaqda ta’ l-istudenti soċjal demokratiċi ‘Pulse’.

Bejn l-1998 u l-2005 Ivan okkupa l-kariga ta’ President fil-kumitat distrettwali tat-tielet distrett tal-Partit Laburista. F’dan il-perjodu huwa ħadem u okkupa diversi karigi oħra fil-partit, fosthom dik ta’ membru fil-kummissjoni elettorali tal-partit kif ukoll membru fil-grupp tal-presidenti u viċi presidenti distrettwali.

Ivan ta sehem attiv fil-ħidma tal-partit fl-elezzjonijiet ta’ l-1996, l-1998 u l-2003. Ivan ġie kkonfermat bħala Kandidat ghall-Partit Laburista fuq it-tielet distrett elettorali lejn l-aħħar tas-sena 2005. It-tielet distrett jikkonsisti fil-Fgura, Wied Il-Għajn u ż-Żejtun.